إدمان الطعام من المشكلات الشائعة في مختلف أنحاء العالم، وبيصاب بها حوالي 5% من سكان العالم، والنسبة دي بتصل إلى 7% بين النساء و3% بين الرجال وكان أول شخص وصف المشكلة هو الدكتور "تي جي راندولف في سنة 1956 واللي وجد أن استهلاك بعض الأشخاص لأطعمة محددة بانتظام شديد بينتج نمط مشابه تمامًا لحالات الإدمان الأخرى وإن الأطعمة دي عادة ما بتكون عالية السعرات وغنية بالدهون والسكر.
ودي مشكلة مش بسيطة لأنها بتسبب مضاعفات صحية خطيرة على الجسم زي البدانة ومرض السكر من النوع الثاني وارتفاع ضغط الدم وتصلّب الشرايين وغيرها من المشكلات الصحية الخطيرة.
وإدمان الطعام زيه زي أي نوع تاني من الإدمان بيأثر على نفس مراكز الإدمان الموجودة في الدماغ زي القشرة الأمامية واللوزة ومنطقة تحت المهاد وغيرها وده بيزيد من تعقيد المشكلة.
وانتشار إدمان الطعام في العصر الحالي بيرجع لعوامل عديدة منها الإجهاد المزمن والتقلبات المزاجية والضغوط العصبية اللي أصبحت من سمات العصر الحديث، وكل المشاكل دي بتأثر بدورها على منطقة ما تحت المهاد والغدة النخامية والغدة الكظرية اللي كلها بتلعب دور كبير في تنظيم عملية الجوع والشبع وضبط الشهية.
تعالوا معانا نعرف إيه هو بالتفصيل تعريف إدمان الطعام
بيتم تعريف إدمان الطعام بإنه إستهلاك قهري للمواد الغذائية المستساغة اللي غالبًا ما بتكون غنية بالدهون والسكر واللي بدورها بتنشط نظام المكافئة في أدمغة البشر وتحسسهم بالإشباع.
أكيد كلكم عايزين تعرفوا السبب في إن الطعام بيسبب الإدمان تعالوا معنا نعرف لماذا الطعام ادماني؟
الطعام زيه زي العقاقير المسببة للإدمان بيتسبب في إطلاق الجسم لمجموعة من الكيماويات منها الدوبامين اللي بينتقل لمسار الشعور بالمكافئة لما بتاكل أطعمة معينة وبيخليك عايز تكرر الشعور ده مرات ومرات.
اقرأ أيضًا: علامات الإجهاد العقلي
دلوقتي بقى هنعرف مع بعض حجم انتشار المشكلة في العالم من خلال عرض احصائيات عن المشكلة وحجمها
بتشير الإحصائيات إلى أن مشكلة إدمان الطعام بتكون السبب وراء 15.2% من حالات البدانة وزيادة الوزن عند الأطفال، ومش بس الأطفال النسبة دي بتوصل لحوالي 13% بين الأشخاص في عمر من 50 – ل80 سنة والنسبة بين النساء بتزيد بدرجة كبيرة عنها بين الرجال، وخاصة إذا كان المسن بيعاني من الوحدة والإهمال.
ودلوقتي هنحط مع بعض خطة علاج ادمان الطعام والحلول اللي ممكن تخلصكم من المشكلة
أول حاجة مجموعات الدعم
واحد من الخطط العلاجية المتبعة لحل مشكلة إدمان الطعام هو الانضمام لبرناج "12 خطوة" اللي بيتبع أسلوب العلاج الجماعي ومجموعات الدعم وده لأن الأشخاص اللي بيعانوا من نفس المشكلة واللي بيدوروا على علاج بيقدروا يساعدوا بعض وبتحس بينهم أنك مش لوحدك وبتلاقوا سوا أنشطة مختلفة ممكن تغنيك عن الأكل الغير ضروري.
الحاجة التانية هي العلاج السلوكي المعرفي
وفي الحالة دي بتحتاج تتابع مع مختص نفسي خبير بعلاج مشكلة إدمان الطعام وبيقدر يساعدك تتخطي المشكلة بشكل كامل.
ثالثًا برامج العلاج التجارية
ودي بتعتمد على مراكز علاجية ونوادي صحية بتشترك فيها وبتدخلك ضمن برنامج علاجي متكامل بيساعدك على التخلص من إدمان الطعام.
رابعًا العلاج النفسي والدوائي
وده بيكون عن طريق الأدوية والعقاقير ومن ضمنها كونتريف ومايسمبا اللي بيستهدفوا مسارات الدماغ المرتبطة بإدمان الطعام والحكاية بتحتاج منك أنك تغير من نمط حياتك عشان تحقق النجاح المطلوب.
باختصار
· كده بنكون عرفنا مع بعض إيه هو إدمان الطعام وأسبابه
· وليه الأكل بيكون من مسببات الإدمان.
· ولأي درجة إدمان الطعام مشكلة منتشرة وله مضاعفات خطيرة.
· وإزاي نتخلص بشكل كامل من المشكلة دي.
ودلوقتي لازم نعرف أن الوقاية أهم مليون مرة من العلاج وأننا لازم نفهم نفسنا بشكل أفضل وما نستسلمش للخيارات السيئة اللي ممكن تدمرنا صحيًا ونفسيًا وتأثر على مظهرنا بشكل سلبي وعلى مواردنا الاقتصادية، وأننا نوجّه مشاعرنا توجيه سليم ونمارس الرياضة أو الأنشطة الاجتماعية بدلًا من الاستسلام للأكل الغير صحي والوقوع في فخ الإدمان.
دمتم بصحة وعافية.
تعليقات
إرسال تعليق